خاطرك سمين....

مازال في تونس نشوفو العباد بالمظاهر مازلنا نحكمو عالعباد بالمظاهر والا بالشكل الخارجي ... اي نعم في تونس  انك تكون لابس حاجة باهية موش كيف تكون لابس حاجة هكاكة و برة... موش كيف تكون طويل كيف تكون قصير ... موش كيف تكون ضعيف كيف تكون سمين... اي نعم سمين...

في تونس خاطرك سمين ماعندكش الحق تعمل الي تحب عليه...

خاطرك سمين ماتنجمش تلبس كيف ماتحب... 

خاطرك سمين كيف يعيطولك باش تكور بلاصتك ديما الغارديان..

خاطرك سمين كيف تحوس على بيسكلات يقولولك مسكينة راهي تتشفع....

خاطرك سمين وين يشمو ريحة الصنان يدورولك ليك انت ديراكت...

خاطرك سمين يطفيوك في البروغرامات خاطرك تاخو بلاصة زايدة في الكرهبة....

خاطرك سمين تضهرلمهم ديما تخوف ...

خاطرك سمين يتقلقو كيف يقعدو بحذاك في التران والا في الكار...

خاطرك سمين و حناكك كبار حاسبينك و حاسبينهم لعبة...

خاطرك سمين تدخل لبوتيك يقعدو يتبعو فيك و يستغربو كيفاه انت داخل لبوتيك خاطر مايبيعوش لبسة السمان ...

خاطرك سمين مالازمكش تحلم...

خاطرك سمين مالازمكش تحلم...

خاطرك سمين مالازمكش تحكي....

خاطرني سمين ماعلى بالي بيكم... بطي اي نعم بطي و سمين و افتخر....

تحية شكر

سيدي بوسعيد, في 6 جانفي 2015.

تحية شكر للي حرص على انو المحطات مايبدلولهمش المنظر العام.
بعد الي كنت نتصور الي باش تصير اعدام كلي للمحطات متاع الضاحية الشمالية كيف الي صار في الضاحية الجنوبية.. اما الي صار عكس الي تصورتو... صار ترميم كلي و تهذيب للمحطات الكل.... يعطيهم الصحة.

يجيك البلاء يا غافل

الزهراء، في 24 جوان 2014.

راكش في قهوة الحومة على روحي نعمل في سيكوبراس جاني واحد صحيبي قعد بحذايا و  قالي:
- ريت خوك شعرة والا مشيت فيها زيزي !!
غزرتلو مفجوع :  شنيا الحكاية يا ولدي؟؟
عطاها تنهيدة و بدا يحكي: "خويا نهارة السبت هبطنا للبانليو نور ( الظاحية الشمالية) خالطين على جماعة صحابنا باش نعملو ركشة على البحر. احنا دوب ماوصلنا بحذاهم و نشوف في طفل صاحبنا يعيط ايجاو ايجاو... و نسمع في واحد اخر في كرهبتو.. نعملك و نفعلك و كفر و سبان.. فهمت الي الحكاية فيها عركة عاد هبطت نجري من الكرهبة في يدي بار حديد..و مشيت للسيد زدمنا عليه هو و زوز اصحابو.
خويا احنا مازلنا ماعملنا شي و فما دورية جات من غادي. جبدو رواحهم الاولاد الاخرين و انا رجعت لكرهبتي باش نحط البار الحديد. سالونا الحاكم:" شفما شنيا الحكاية؟" تكلم واحد منا و قال:" راهم الجماعة هاذوكم حبو يحصروا بنات معانا في كرهبتهم.. عبارة على براكاج". قاللنا الحاكم :"ستناو لهنا " و مشاو زوز يحكيو مع الجماعة لخرين..دقيقتين و سيبوهم و رجعولنا... واحد منهم (الحاكم) تكلم و قال :"وينو هاك الباندي الي هابط بالحديد "( ماشي في بالو سيف والا سكينة) تكلمت انا قتلو:" حديدة موش حديد.". قالي:" مدها" .. حليت باب الكرهبة و مديت يدي تحت الكرسي و جبدتلو الحديدة... بدا يحكيلي و يجبد عليا بالمرتاح في هاذي عادي نعديوهالك سلاح ابيض في ستة شهر في كارك جيت شكيت في درا شنية. تي اكهو كملنا حكينا و بدينا نفدلكو و مدلي الحديدة و قالي برا على روحك. هو مازال ماكملش كلامو و تكلم زميلو ورايا:" ستنا ستنا شوف اش لقيت عندو". طلع السيد بعد مامديت الحديدة دخل للكرهبة و بدا يفركس.. المهم مد يدو و خرج طرف زطلة... اي نعم زطلة هي الي لقاها في الكرهبة. الحاصل تفجعت و وهڤت شويا و بدات السيناريوهات تدور في مخي و قتلو :" لا يا خويا موش متاعي الشي هذا و موش متاعك اللعب هذا ... ماناش متاع الشي هذا" و بدات مناقشات خفيفة بيني و بين الاعوان و الاولاد الي معايا و بدات تتشنج شويا .. تعمل هكة تتكلم طفلة معايا في الكرهبة :"ريتك اي ريتك كيفاه خرجتها من جيبك و في يدك و عملت هكا حطيت يدك في الكرهبة كوم كوا جبدتها من غادي"... و كملت المناقشات ومعانا الطفلة من غادي ... زاد تكلم طفل معايا و قالو :" خويا رانا كيف الزملاء نخدم مع وزارة الداخلية" هو كمل كلامو و جبدو عون من الجماعة و مشاو على جنب و بداو يحكيو ... شويا اخر و رجعوا و دارلي واحد اخر من الاعوان و هو يضحك. :" برا على روحك انت طفل نظيف نفدلكوا معاك جوست حبينا نكبسوك اكهو و الزطلة هاذي متاع زوز ولاد شديناها عندهم قبيلة.. استرجلنا معاهم و سيبناهم يروحوا.. ماك تعرف رمضان هلى الابواب"... قعدت نغزرلو و مانيش مصدق الحكاية ... تفدليكة !!!! اكهو كملت الحكاية بضحكة و هزوا رواحهم الحاكم و مشاو...  اي نعم مشاو وخلاوني ماني فاهم شي.....هاذي هي الحكاية يا صاحبي... خوك لتوة مبهم.. ماني فاهم والو.. بضحك و لعب كنت نجم نمشي فيها ... والا تكون بالرسمي تفدليكة كيف ماقالوا و ماكانوش ناوين حتى شي من الاول"
اكهو كملنا شربنا قهيوتنا و انا مخي بدا يخدم و بدات الاسئلة: علاه ماكبشوش فيه و ماهزوهش للمركز ؟؟ خافو من حكاية والا بالرسمي يفدلكوا؟؟ قداه من واحد طاحو بيه ولاد حرام و لفقولوا الزطلة من الحيط؟؟ والا صعيب باش تلفقهالو خاطر التحليل مبعد يجيب؟؟؟

مخ الهدرة .... "يجيك البلاء يا غافل" و ربي يبعد علينا الشي هذا الكل....

عيد ميلادي السابع والعشرون... 27 سنة

تونس،  29 جانفي 2014

27 سنة... اي نعم اليوم سكرت ال27 و حليت باب ال 28...
 27 سنة تعداو في رمشة عين.. تعداو معاهم برشا فرحة و برشا حزن...
تعداو معاهم برشا ضحكة و برشا غش... تعداو معاهم برشا لحظات بهجة و شيخة كيف ما تعداو معاهم ايامات فدة و ڨينية...
27 سنة عرفت فيهم برشا عباد باهين و لتوا مازالت اون كونتاكت معاهم.. و عرفت زادة عباد ماكانوش باهين معايا اما عادي نعيشوا و نتعلموا..
 مخ الهدرة نشكر العباد الكل الي عاونوني باش نوصل للي انا فيه توا بعد 27 سنة..
بعد الي قلتو الكل يقعد السؤال الي نسألو لروحي  كل عام ... عمري 27 والا 28 سنة؟

اي اي نسيت حاجة... هابي بارثداي تو مي.... عيد ميلاد سعيد مراد نياهاهاها

#BrabbiLocal #ACPT

تونس، المدينة العتيقة، 18 جانفي 2014

حملة #BrabbiLocal   هي مبادرة من طرف شبان حاجتهم ب لوكال.. برشا باش يفهموها بالغالط اما ميسالش تبعوني للآخر. الشباب هاذوما حاجتهم ب لوكال يمارسوا فيه النشاط متاعهم.. نشاط ثقافي موسيقي .. اي حاجة !! النشاط هذا يساعد باش يعطي تصويرة باهية على تونس و يعاون على برشا حاجات الكل نعرفوهم اما قاعدين نطفيو في الضو.. اللوكال الي حاجتهم بيه موش متاع إدارة و هاك الريق الفارغ.. مجرد حيوط و سقف و تريسيتي كهو بليصة يخدمو فيها خدمتهم مرة في الجمعة الحكاية ماتفوتش شطر نهار اكهو. بليصة كيف ماقلنا يمارسوا فيها الأنشطة متاعهم .. انشطة تعاون على تطوير الحياة الثقافية في تونس إلي كل عام ماشية و تدهور، الحياة الثقافية الي الشباب عندو دور كبير و فعال فيها و ينجم باقل التكاليف ينهض بصورة تونس و يرجعلها مكانتها بين البلدان.
 الشباب هاذوما ماهمش مسيبين منطوين تحت جمعيات .. يعني الإطار القانوني متواجد. الحملة هاذي بداوها الستاف متاع "جمعية نادي صور تونس" على خاطرهم عندهم مدة يخدموا و ماعندهمش لوكال كل مرة في بلاصة، تواتي مرة يرضاو عليهم بلوكال اما فيسع مايقلبو عليهم على خاطر النشاط متاعهم موش مهم ياسر في نظر برشا ناس اخرين..و الغريب في الامر الي وزارة الثقافة عندها برشا اماكن بيبانها مسكرة و مهملة و ماهيش مستغلة و الا مستغلينها في ما لا يعني. 
 المهم و في الآخر اللوكال مستحقينلوا برشا جمعيات تنجم تنتج اما ناقصها طرف لهوة صغيره من السلطات و الا المجتمع المدني. الحاصيلو انا عضو في "جمعية نادي صور تونس" و رانا باش نخدمو خدمتنا احب من احب و كره من كره..
#ACPT à la vie à la mort  

#BrabbiLocal

صورة جماعية لأعضاء "جمعية نادي صور تونس" مأخوذة في بير الأحجار

Jour de Paye

La Medina le 22 juillet 2013. Tunis.

هذا الحساب الصغير... و نستناو في يوم الحساب

La Galite... le rêve continue!

La Galite le 21 Juin 2013, Bizerte.

مانجم نقول كان ... سبحان الله .